پاکستان کر کٹ بورڈ گورننگ باڈی کااجلاس پرسوں طلب کر لیا گیا

لاہور (نمائندہ سپورٹس+ سپورٹس رپورٹر)پاکستان کرکٹ بورڈکی گورننگ باڈی کا اجلاس پرسوں طلب کرلیا گیا ۔ بطور چیئرمین شہریار خان کا یہ آخری اجلاس ہو سکتا ہے ۔نیشنل کرکٹ اکیڈمی لاہور میں ہونیوالے اجلاس کی صدارت چیئرمین شہریارخان کرینگے۔ اجلاس میں بجٹ پر تفصیلی بحث جب کہ کرکٹ کمیٹیوں سمیت دیگر کمیٹیوں کے کاموں میں پیش رفت پر بات چیت ہو گی ۔دورہ انگلینڈ کے لیے قومی ٹیم کی تیاری پر بھی اجلاس میں بات ہو گی۔ چیئرمین شہریار خان جون کے تیسرے ہفتے گرمیوں کے چھٹیوں پر انگلینڈ جا رہے ہیں اس دوران وہ پچیس جون سے شروع ہونیوالے آئی سی سی اجلاس میں شرکت کرینگے ۔ذرائع کے مطابق اگست میں وطن واپسی پر وہ اپنا عہدہ چھوڑ سکتے ہیں۔ پی سی بی ذرائع کے مطابق شہریار خان چھٹیوں کے بعد بیس اگست سے اپنے عہدے سے الگ ہو سکتے ہیں اس لیئے یہ ان کا آخری اجلاس قرار دیا جا رہا ہے ۔