کراچی (اسپورٹس رپورٹر) آل کراچی ماما کریم بخش قمبرانی یادگاری فٹبال ٹورنامنٹ کے پری کوارٹر فائنل میچ میں جلال مراد نے یاسین اسٹار کو4-2 گول سے شکست دی۔ میچ کے دسویں منٹ میں فاتح ٹیم کے زبیر نے میچ کا پہلا گول کرکے اپنی ٹیم کو 1-0سے سبقت دلانے کے بعد اٹھارہویں منٹ میں دوسرا گول کیا ۔ بائیسویں منٹ میں یاسین اسٹار نے عرفان کے گول کی بدولت مقابلہ2-1کرکے میچ کو سنسنی خیز بنادیا۔دوسرے ہاف کے پانچویں منٹ میں زبیر نے تیسرا گول کرکے ہیٹ ٹرک مکمل کی ۔ جلال مراد کے ندیم نے اپنی ٹیم کا چوتھا گول اسکور کرکے مقابلہ 4-1پر پہنچادیا۔ یاسین اسٹار نے تین گول کے خسارے میں جانے کے باوجود میچ میں واپسی کی کوششیں جاری رکھیں لیکن کھیل کے آخری لمحات میں مزید صرف ایک گول کرنے میں کامیاب ہوسکی اور اس طرح یہ شاندار پری کوارٹر فائنل میچ 4-2کے نتیجہ کے ساتھ یاسین اسٹار کو شکست دے کر جلال مراد نے اپنے نام کرلیا۔پہلا شاندار کوارٹر فائنل میچ آج ہفتہ کو صاحبداد محمڈن اور ارمان اسٹار کی ٹیموں کے مابین کھیلا جائے گا۔