واشنگٹن(این این آئی)امریکی صدر ڈونلڈ ٹرمپ نے سابق وزیرخارجہ کولن پائول کو کڑی تنقید کا نشانہ بناتے ہوئے انہیں عراق جنگ میں امریکا کو غیر ضروری طور پرالجھانے کا ذمہ دار قرار دیا ہے۔عرب ٹی وی کے مطابق کول پائول کی جانب سے ڈیموکریٹک صدارتی امیدوار جوبائیڈن کی حمایت کے اعلان کے بعد امریکی صدر نے ایک بیان میں سابق امریکی وزیر خارجہ کولن پائول پر شدید تنقید کی اور انہیں عراق جنگ کا ذمہ دار ٹھہرایا۔سابق امریکی صدر جارج ڈبلیو بش کے دور میں امریکی وزیرخارجہ رہنے والے کولن پائول نے دو روز قبل ڈیموکریٹک پارٹی کے صدارتی امیدوار جوبائیڈن کی حمایت کا اعلان کیا تھا۔ اس پر صدر ٹرمپ نے ایک ٹویٹ میں اپنا رد عمل دیتے ہوئے لکھا کہ کولن پائول مشرق وسطی کی تباہ کن جنگوں میں ہماری شمولیت کا ذمہ دار ہے۔ وہ ایک اور مغرور شخص ہے اور ایک دوسرے مغرور جو بائیڈن کو ووٹ دینا چاہتا ہے۔صدر ٹرمپ نے مزید لکھا کہ کیا پائول نے یہ نہیں کہا کہ عراق کے پاس بڑے پیمانے پر تباہی پھیلانے والے ہتھیار تھے؟ عراق کے پاس ایسا کچھ نہیں تھا مگر ہمیں عراق کی جنگ میں الجھا دیا گیا۔پائول نے امریکی ٹی وی پر سٹیٹ آف دی یونین پروگرام میں شرکت کے دوران کہا کہ ہمارے پاس ایک آئین ہے ، ہمیں اس آئین پر عمل کرنا ہے اور صدر ٹرمپ اس سے دور ہوگئے ہیں۔انہوں نے مزید کہا کہ میں اس سال ٹرمپ کی کسی صورت میں حمایت نہیں کرسکتا بلکہ میں جوبائیڈن کو ووٹ دوں گا۔