لاہور (سپورٹس رپورٹر) پاکستان سپر لیگ کے باقی میچز کا آغاز آج سے ہو گا، ابوظہبی سٹیڈیم میں لاہور قلندرز اور اسلام آباد یونائیٹڈ کی ٹیمیں مدمقابل ہوں گی، زندہ دلان کی ٹیم کے کپتان نے ایونٹ میں فاتحانہ انٹری ڈالنے کا عزم ظاہر کر دیا۔میچ رات 9 بجے شروع ہو گا۔ میدان بغیر تماشائیوں کے سجے گا،تیاریاں مکمل، پلان بھی فائنل ہو گئے۔دو بار کی چیمپئن اسلا م آباد یونائیٹڈ کو نفسیاتی برتری حاصل ہے، آخری پانچ میچز میں فتح سے مورال بھی ہائی ہے۔ کپتان شاداب خان کو حسن علی پر مان ہے تو الیکس ہیلز بھی ٹیم کی جان ہوں گے۔ فخر زمان ٹیم کا فخر ہیں تو محمد حفیظ بھی جادوئی پرفارمنس دینے کے منتظر ہیں۔ شاہین آفریدی تیکھی بائولنگ کرائیں گے، راشد خان تگنی کا ناچ نچائیں گے۔کل دس جون کو دو میچ شیڈول ہیں، کراچی کنگز کا ملتان سلطانز سے ٹاکرا ہوگا اور لاہور قلندرز کا پشاور زلمی سے مقابلہ ہوگا۔