متحدہ قومی موومنٹ پاکستان نے الیکشن کمشن کی قانونی حیثیت کو  چیلنج کردیا

کراچی(نیوزرپورٹر)متحدہ قومی موومنٹ پاکستان نے الیکشن کمیشن کی قانونی حیثیت کو سندھ ہائی کورٹ میں چیلنج کردیاہے۔بدھ کوسندھ ہائیکورٹ نے ایم کیو ایم پاکستان کی درخواست پرفریقین کو نوٹس جاری کرتے ہوئے اٹارنی جنرل پاکستان، الیکشن کمیشن اور دیگر سے جواب طلب کرلیا۔جسٹس جنید غفار نے نوٹیفکیشن فوری معطل کرنے سے انکار کرتے ہوئے ریمارکس دیئے کہ عدالت سے رجوع کرنے میں تاخیر کی گئی۔ نوٹیفکیشن اپریل اورمئی کے شروع کے ایام کے ہیں۔عدالت نے ریمارکس میں کہا کہ تعطیل کے دوران عدالت سے رجوع کیا گیا ہے، وقت کے حساب سے درخواست دائر کرنی چاہئے تھی۔ ہم نے فریقین کو نوٹس جاری کردیا ہے، حکم امتناع جاری نہیں کرسکتے۔آئینی درخواست ایم پی اے کنور نوید اورڈسٹرکٹ میونسپل کارپوریشنز کے سابق چیئرمینوں کی جانب سے دائر کی گئی تھی۔ایڈووکیٹ طارق منصور نے موقف پیش کیا کہ الیکشن کمیشن کے ارکان مکمل نہیں اس لیے اس کو بلدیاتی انتخابات کے بارے میں فیصلے نہیں کرنا چاہیئں۔وکیل درخواست گزار نے کہا کہ الیکشن کمیشن کی جانب سے 29 اپریل کو جاری کردہ نوٹیفکیشن کالعدم اورغیر آئینی قرار دیا جائے۔ الیکشن کمیشن کی جانب سے بلدیاتی انتخابات کیشیڈول، ضلع کونسل کی حدود سمیت دیگر فیصلے غیر قانونی قرار دیئے جائیں۔درخواست میں چیف الیکشن کمشنر، الیکشن کمیشن پاکستان، الیکشن کمیشن سندھ، چیف سیکریٹری سندھ اور دیگر کو فریق بنایا گیا ہے۔
ایم کیو ایم/  چیلنج