اینٹی کرپشن کورٹ کے سپیشل جج علی رضا نے پرویز الہٰی اور شریک ملزم رائے ممتاز کی ضمانت بعد از گرفتاری کی درخواست پر سماعت کی، پرویز الہٰی کی جانب سے ایڈوکیٹ رانا انتظار عدالت پیش ہوئے۔ مقدمہ کا ریکارڈ آج بھی پیش نہ کرنے پر عدالت نے برہمی کا اظہار کیا، پرویز الہٰی کے وکیل نے استدعا کی کہ مقدمہ کا ریکارڈ آج بھی پیش نہیں کیا گیا ، عدالت ڈی جی اینٹی کرپشن کے وارنٹ گرفتاری جاری کرے، جس پر پراسیکیوشن نے مؤقف اختیار کیا کہ عدالت کچھ وقت دے ڈائریکٹر اینٹی کرپشن پیش ہو جاتے ہیں۔ اینٹی کرپشن عدالت کے سپیشل جج علی رضا نے ریمارکس دیے کہ ریکارڈ پیش کریں ورنہ ڈی جی اینٹی کرپشن کے وارنٹ گرفتاری جاری کر دیتا ہوں۔ بعد ازاں عدالت نے اینٹی کرپشن کو مقدمے کا ریکارڈ پیش کرنے کے لیے آخری مہلت دیتے ہوئے سماعت کل 10 جون تک ملتوی کردی۔ واضح رہے پرویز الہٰی اور دیگر پر پنجاب اسمبلی میں ریکارڈ میں ردوبدل کرکے بھرتیوں کا الزام ہے، سابق وزیراعلیٰ کے شریک ملزم رائے ممتاز حسین نے بھی درخواست ضمانت دائر کر رکھی ہے۔