سانحہ 9 مئی کے کرداروں کو فوری سزا دلانے کیلئے پنجاب اسمبلی میں قرارداد جمع  

لاہور ( این این آئی) سانحہ9مئی2023ء کے کرداروں کو فوری قرار واقعی سزا دلانے کے لئے پنجاب اسمبلی میں قرار داد جمع کردای گئی ۔پنجاب اسمبلی میں استحکام پاکستان پارٹی کے رکن پنجاب اسمبلی شعیب صدیقی نے قرار داد جمع کروائی ہے۔قراداد کے متن میں کہا گیا ہے کہ 9مئی کے ماسٹر مائنڈ،منصوبہ سازوں اور ذمہ داران کو سخت سے سخت سزا دی جانی چاہیے، فوجی تنصیبات اور شہدا کی یادگاروں کی بے حرمتی اور منفی پراپیگنڈہ کرنیوالے کسی رعایت کے مستحق نہیں۔قرارداد کے متن میں شعیب صدیقی نے کہا کہ 9مئی کا دن المناک، افسوسناک،دلخراش، نا قابل فراموش سانحہ اور سیاہ ترین باب ہے، ریاست،ملکی سلامتی،اعلی عدلیہ اور اداروں کے خلاف ہونیوالی گھنانی سازش بے نقاب ہوگئی، امن و امان کی صورتحال بگاڑنے اور عوام اور اداروں میں تصادم کرانے والوں کوسزا ملنی چاہیے۔قرارداد میں مطالبہ کیا گیا ہے کہ جناح ہائوس اور دیگر شہروں میں تباہی پھیلانے والوں کو جلد از جلد کیفر کردار تک پہنچایا جائے۔