”خواتین کے عالمی دن پر لیڈیز پارک کے 2 تحفے“شہباز شریف نے بیڈ منٹن کھیلی

لاہور (خصوصی رپورٹر) وزیراعلیٰ پنجاب محمد شہباز شریف کا تاج پورہ اور گجر پورہ میں لیڈیز پارک کے افتتاح کے لئے آمد پر شاندار استقبال کیاگیا۔ سڑکوں کے دونوں طرف لوگوں کی بڑی تعداد موجود تھی اور اپنے محبوب قائد کو دیکھ کر"دیکھو دیکھو کون آیا۔۔شیر آیا ،شیر آیا"، "نواز شریف ،شہبازشریف۔۔زندہ باد"کے واشگاف نعرے لگاتے رہے۔ لوگوں نے گھروں اور دکانوں کی چھتوں پر کھڑے ہوکر وزیراعلیٰ کا والہانہ استقبال کیا۔ وزیراعلیٰ نے پارک میں بیڈ منٹن کورٹ پر بیڈمنٹن کھیلی جبکہ گجرپورہ میں ایک گاڑی پرکارکن زندہ شیر لے کر گھومتے رہے۔ لوگوں نے ڈھول کی تھاپ پر رقص کیا اور گھوڑوں نے خوبصورت ڈانس پیش کیا۔ وزیراعلیٰ نے گجرپورہ لیڈیز پارک میں بچیوں کے ساتھ تصاویر اتروائیں۔ خواتین نے وزیراعلی کو درازی عمر کی دعائیں دیتے ہوئے کہا کہ خواتین کے عالمی دن کے موقع پر پنجاب حکومت کی طرف سے خواتین کو دو لیڈیز پارک کے شاندار تحفے دیئے گئے ہیں۔