ٹائروں کی فیکٹری، پلازہ سمیت 7 مقامات پر آتشزدگی، لاکھوں روپے کا نقصان

لاہور (سٹاف رپورٹر+ نامہ نگار) شہر میں ٹائروں کی فیکٹری، پلازہ اور پٹرول پمپ سمیت 7 مقامات پر آتشزدگی کے واقعات میں لاکھوں روپے کا سامان جل گیا۔ ریسکیو ٹیموں نے موقع پر پہنچ کر آگ پر قابو پالیا۔ معلوم ہوا ہے کہ تھانہ شالیمار کے علاقہ میں شیلر چوک میں اکبر کی ٹائروں والی فیکٹری میں اچانک آگ لگ گئی، دیکھتے ہی دیکھتے آگ کے شعلے آسمان سے باتیں کرنے لگے۔ آگ لگنے سے پورے علاقہ میں بھگڈر مچ گئی جبکہ آتشزدگی سے فیکٹری میں موجود لاکھوں روپے مالیت کا قیمتی سامان جل گیا۔ ادھر شالیمار لنک روڈ پر واقع پٹرول پمپ میں اچانک آگ لگ گئی، آگ لگتے ہی پٹرول پمپ اور اردگرد موجود افراد نے بھاگ کر جان بچائی۔ آگ لگنے کی اطلاع ریسکیو ٹیموں کو دی جنہوں نے فوری طور پر موقع پر پہنچتے بھرپور کوششوں کے بعد آگ پر قا بو پا لیا۔ تیسرے واقع میں ایجرٹن روڈ پر واقع واقع اجمل پلازہ میں اچانک آگ بھڑک اٹھی جس سے پلازے میں موجود دفاتر کا قیمتی ریکارڈ جلنے کا اندیشہ ہے۔ ریسکیو ٹیموں نے موقع پر پہنچ کر آگ پر قابو پالیا۔ علاوہ ازیں شاہدرہ کے علا قے یوسف پارک میں اےک گھر، شاد باغ کے علاقے میں چائنہ سکیم میں اےک جنرل سٹور، بازار حسن شاہی محلہ مےں ایک گھر میں جبکہ ہربنس پورہ میں انٹرچینج کے قریب ایک گودام میں شارٹ سرکٹ کے باعث آگ لگنے سے لاکھوں روپے مالےت کا سامان جل کر تباہ ہوگیا ہے۔ ریسکیو 1122 اور فائر بر یگیڈ کے عملے نے آگ پر قابو پالیا۔
آتشزدگی