پاکستان اسٹاک ایکس چینج: جمعرات کو بھی شیئرز کے کاروبار میں اتارچڑھائو کے بعد مندی

پاکستان اسٹاک ایکس چینج میں کاروبار حصص مسلسل مندی کا شکار ہے اور جمعرات کو بھی شیئرز کا کاروباراتارچڑھائو کے بعد مندی کی لپیٹ میں رہا،47.69فیصد حصص کی قیمتوں میں کمی رہی جبکہ کاروباری حجم گذشتہ روز بدھ کے مقابلے میں31.02فیصدکم رہا۔مسلسل مندی کی وجہ سے جمعرات کو کے ایس ای100انڈیکس35000،اور34900کی نفسیاتی حدوں سے گرکر3سال8ماہ کی کم ترین سطح پر آگیا۔ سرمایہ کاروں کے مزید38ارب95کروڑروپے سے زائد کا نقصان اٹھانا پڑا۔رواں کاروباری ہفتے کے چوتھے روز جمعرات کوحکومتی مالیاتی اداروں مقامی بروکریج ہائوسز سمیت دیگرانسٹی ٹیوشنز کی جانب سے توانائی،سیمنٹ،بینکنگ اور دیگرمنافع بخش سیکٹرمیں خریداری کے باعث کاروبار کا آغاز مثبت زون میں ہواٹریڈنگ کے دوران ایک موقع پر کے ایس ای100انڈیکس35297پوائنٹس کی سطح پر بھی دیکھاگیاتاہم ملک کی اقتصادی ٹیم میں تبدیلیوں کے بعد نئے وفاقی بجٹ میں سخت اقدامات کے خدشات، آئی ایم ایف سے بیل آئوٹ پیکیج کے لیے جاری مذاکرات میں روپے کی قدر مزید گھٹنے، ڈسکائونٹ ریٹ میں مزید اضافے کے خدشات اور نئے مالی سال کے بجٹ میں700سے 750ارب روپے کے اضافی ٹیکس عائد ہونے کی خبروں نے پاکستان اسٹاک ایکس چینج کو اپنی لپیٹ میں لیا، جس سے کے ایس ای100 انڈیکس دوران ٹریڈنگ 34828 پوائنٹس کی سطح پر بھی دیکھاگیاتاہم غیرملکی سرمایہ کاروں کی جانب سے منافع بخش سیکٹرکی نچلی سطح پر آئی ہوئی قیمتوں پرخریداری کی گئی ، جس کے نتیجے میں مارکیٹ میں ریکوری آئی تاہم اتارچڑھائو کا سلسلہ سارادن جاری رہا،مارکیٹ کے اختتام پر کے ایس ای 100 انڈیکس 147.39 پوائنٹس کمی سے34887.64 پوائنٹس پر بندہوا۔کے ایس ای30انڈیکس58.10پوائنٹس کمی سے16493.52پوائنٹس،کے ایم آئی 30
ا نڈیکس208.22پوائنٹس اضافے سے54958.77پوائنٹس جبکہ کے ایس ای آل شیئر انڈیکس120.50پوائنٹس کمی سے 25744.43 پوائنٹس پربندہوا ۔ ماہرین اسٹاک کا کہنا ہے کہ اقتصادی ٹیم میں حالیہ تبدیلیوں کے تناظر میں سرمایہ کاروں کو یہ خدشات لاحق ہوگئے ہیں کہ نئے وفاقی بجٹ میں کیپیٹل مارکیٹ کو کسی قسم کاکوئی ریلیف نہیں ملے گا، یہی منفی عوامل جمعرات کوبھی اسٹاک مارکیٹ کی نفسیات پر چھائے رہے اور مارکیٹ تنزلی سے دوچارہوئی۔ جب کہ ماہ رمضان المبارک کی آمد کے باعث بھی سرمایہ کاری کے بیشتر شعبوں نے مارکیٹ سے اپنے سرمائے کے انخلا کو ترجیح دی ۔جمعرات کومجموعی طور پر304کمپنیوں کے حصص کا کاروبار ہوا،جن میں سے139کمپنیوں کے حصص کے بھاؤمیں اضافہ، 145 کمپنیوں کے حصص کے بھاؤ میں کمی جبکہ20کمپنیوں کے حصص کے بھاؤ میں استحکام رہا۔جمعرات کومجموعی طور پر 7 کروڑ 80 لاکھ 99 ہزار 340 شیئرز کاکاروبارہوا،جوبدھ کی نسبت 3کروڑ51لاکھ36ہزار390شیئرزکم ہیں۔مارکیٹ کا مجموعی سرمایہ 38ارب95کروڑ 38 لاکھ 26 ہزار 90روپے کی کمی سے71کھرب43 ارب47 کروڑ34لاکھ97ہزار470روپے رہ گیا۔