لاہور(سپورٹس رپورٹر) سوشل میڈیا پر جاری ڈریم پیئر مہم میں وزیراعظم پاکستان اور 1992 ورلڈ کپ کی فاتح ٹیم کے کپتان عمران خان اور سابق ٹیسٹ کرکٹر شاہد آفریدی کی جوڑی مقبول ترین آل راونڈر پیئر بن کر ابھری ہے۔ پی سی بی ڈریم پیئر مہم کی آل راونڈر کٹیگری میں کل 8 لاکھ سے زائد سوشل میڈیا صارفین متحرک نظر آئے جنہوں نے اپنی خواہشات کا اظہار کرتے ہوئے عمران خان اور شاہد آفریدی کی تصوراتی جوڑی کو خوب سراہا۔ اس دوران شاہد آفریدی اور عبدالرزاق کی جوڑی مقبولیت میں دوسرے نمبر پر رہی جب کہ عمران خان اور عبدالرزاق کی جوڑی تیسرے نمبر پر مقبول قرار پائی۔ اس موقع پر قومی کرکٹ ٹیم کے موجودہ اور سابق کھلاڑیوں نے بھی اس مہم میں اپنا حصہ ڈالا۔ راشد لطیف نے عمران خان اور شاہد آفریدی، باسط علی نے عمران خان اور وسیم اکرم جب کہ وہاب ریاض نے عبدالرزاق اور اظہر محمود کی جوڑیوں کو اپنے اپنے ڈریم پیئر کے طور پر چنا۔ فاسٹ بولرز کے ڈریم پیئرز میں ٹو ڈبلیوز کی جوڑی نے مقبولیت کے تمام گذشتہ ریکارڈز توڑے جب کہ اسپنرز کی کٹیگری میں گگلی ماسٹر مرحوم عبدالقادر اور دوسرا کے موجد ثقلین مشتاق کی سپن جوڑی کو مقبول ترین قرار دیا گیا۔