اسلام آباد (خبر نگار خصوصی) لاہور کور ہیڈکوارٹرز میں فوجی افسروں اور جوانوں میں اعزازات تقسیم کرنے کی تقریب منعقد ہوئی۔ آئی ایس پی آر کے مطابق کور کمانڈر لاہور لیفٹیننٹ جنرل سید عامر رضا ایچ آئی (ایم) اس موقع پر مہمان خصوصی تھے۔ تقریب میں فوجی افسروں اور جوانوں کو ستارہ امتیاز (ملٹری)، تمغہ امتیاز (ملٹری) اور تمغہ بسالت کے اعزازات سے نوازا گیا۔ 25 افسران کو ستارہ امتیاز (ملٹری)، 27 افسران کو تمغہ امتیاز (ملٹری) اور 18 شہید سپاہیوں کو تمغہ بسالت سے نوازا گیا۔ شہداء  کے تمغے ان کے اہل خانہ نے وصول کئے۔ تقریب میں آرمی کے اعلیٰ افسران اور ایوارڈ حاصل کرنے والوں کے اہل خانہ کی بڑی تعداد نے شرکت کی۔ پشاور کور میں بھی اعلی عسکری خدمات پر فوجی اعزازات تقسیم کرنے کی تقریب گزشتہ روز منعقد ہوئی۔ آئی ایس پی آر کے مطابق کور کمانڈر پشاور لیفٹیننٹ جنرل حسن اظہر حیات اس موقع پر مہمان خصوصی تھے۔ فوجی افسروں اور جوانوں کو ستارہ امتیاز (ملٹری)، تمغہ امتیاز (ملٹری) اور تمغہ بسالت کے اعزازات سے نوازا گیا۔ شہداء  کی جانب سے 4 جونیئر کمیشنڈ آفیسرز (JCOs) اور 29 سپاہیوں کے رشتہ داروں نے تمغہ بسالت حاصل کی۔ 5افسران کو ستارہ امتیاز (ملٹری) اور 15افسران کو قوم کے لیے بہترین خدمات سرانجام دینے پر تمغہ امتیاز (ملٹری) سے نوازا گیا۔ تقریب میں آرمی کے اعلیٰ افسران اور ایوارڈ حاصل کرنے والوں کے اہل خانہ کی بڑی تعداد نے شرکت کی۔