کرکٹ کے میدان سے ایک اور اچھی خبر، انگلینڈ کے دورہ پاکستان کا امکان

لاہور( سپورٹس رپورٹر) پاکستان کرکٹ کے لیے ایک سے بڑھ کر ایک اچھی خبر آنے لگی ۔ آسٹریلوی ٹیم کے آنے کا اعلان ہوتے ہی انگلش کرکٹ بورڈ کے چیف ایگزیکٹیو ٹام ہیرسن آج لاہور پہنچیں گے اورچیئرمین رمیز راجہ سے ملاقات میں اپنی منسوخ سیریز کے آئندہ سال انعقاد کی یقین دہانی کرائیں گے۔کھلاڑیوں کے بعد انتظامیہ کی بھی ایک سے بڑھ کر ایک بڑی جیت ،پاکستان کرکٹ بورڈ کی کامیاب سفارتکاری کے اثرات ظاہر ہونے لگے ۔ٹام ہیرسن گذشتہ ماہ ٹیم کے مختصر دورہ پاکستان کی منسوخی پر معذرت ہی نہیں کریں گے بلکہ آئندہ سال مکمل سیریز کی یقین دہانی بھی کرائیں گے۔شیڈول کے مطابق سی ای او انگلش کرکٹ بورڈ ایک روزہ دورہ کے بعد منگل کو ہی دبئی روانہ ہو جائیں گے جہاں انہیں انٹرنیشنل کرکٹ کونسل کے اجلاس میں شرکت کرنی ہے۔