لاہور (نامہ نگار) شہر کے مختلف علاقوں میں 4 افراد پراسرار طور پر ہلاک ہو گئے ہیں۔ ٹاؤن شپ کے علاقے محمد علی چوک کے قریب گھر سے 55 سالہ توفیق کی لاش ملی ہے۔ توفیق گھر میں اکیلا ہی رہتا تھا۔ شاہدرہ ٹیچنگ ہسپتال میں تین نامعلوم افراد60 سالہ نامعلوم شخص کو بیماری کی حالت میں چھوڑ کر فرار ہوگئے۔ جو بعد میں دم توڑ گیا۔ ملت پارک کے علاقہ پکھی ٹھٹی چوک کے قریب سے 55 سالہ نامعلوم شخص کی لاش ملی ہے جبکہ بادامی باغ کے علاقہ رنگ روڈ کے قریب  سے 6 روز قبل خون میں لت پت 65 سالہ شخص زخمی حالت میں ملا۔ عینی شاہدین کے مطابق اس  کو ٹرک کچل کر فرار ہو گیا۔ زخمی شخص گزشتہ روز زخموں کی تاب نہ لاتے ہوئے دم توڑ گیا ہے۔ پولیس نے چاروں لاشیں قبضے میں لے کر پوسٹ مارٹم کے لیے مردہ خانے منتقل کر کے تفتیش شروع کر دی ہے۔