سندھ انٹر سکول کرکٹ کشمور ڈسٹرکٹ،حرہ پبلک اور جی بی ایچ ایس میانی سہراب سکول فاتح

کراچی(اے پی پی)حرہ پبلک اور جی بی ایچ ایس میانی سہراب سکول کی ٹیموں نے سندھ انٹر سکول کرکٹ کشمور ڈسٹرکٹ میں اپنے اپنے میچز جیت لئے۔سندھ کرکٹ ایسوسی ایشن کے زیر اہتمام اور حکومت سندھ کے تعاون سے جاری سندھ انٹر سکول کرکٹ ٹورنامنٹ میں کشمور ڈسٹرکٹ میں کھیلے گئے پہلے میچ میں حرہ پبلک سکول نے جی بی ایچ ایس بھٹائی سکول کو 53رنز سے شکست دے دی۔ حرہ پبلک سکول نے 144رنز سکور کئے۔ نثار نے 38 اورحق نواز نے 22رنز بنائے۔ حفیظ اللہ نے عمدہ بولنگ کی اور 22 رنز کے عوض دو وکٹیں حاصل کیں۔ عاقب نے بھی دو کھلاڑیوں کوآئوٹ کیا۔ جواب میں جی بی ایچ ایس بھٹائی سکول 91رنز پر آئوٹ ہوگئی۔ اشتیاق شاہ نے 13رنز بنائے۔ آغا احمد نے 23 رنز دیکر چار کھلاڑیوں کو آئوٹ کیا۔ عبدالرحمن کے حصہ میں تین وکٹیں آئیں۔ دوسرے میچ میں جی بی ایچ ایس میانی سہراب سکول نے جی بی ایچ ایس تنگوانی سکول کو 8وکٹوں سے ہرادیا۔ جی بی ایچ ایس تنگوانی اسکول کی ٹیم نے پہلے بیٹنگ کرتے ہوئے صرف 78رنز بنائے جس میں سرفراز کے 18رنز بھی شامل تھے۔ زبیر علی نے 29 رنز کے عوض5اور ساجد علی نے 4 رنز دیکر 3 وکٹیں حاصل کیں۔ جواب میں فاتح ٹیم نے ہدف دو وکٹوں پر حاصل کرلیا۔ نور محمد نے 30 اورامجد علی نے 23رنز بنائے۔