برطانیہ میں شرح سود میں کمی کردی گئی، مارگیج ادا کرنے والوں کو بڑا ریلیف مل گیا، بینک آف انگلینڈ نے شرحِ سود میں صفر اعشاریہ دو پانچ فیصد کمی کر دی۔
غیر ملکی ذرائع ابلاغ کے مطابق بینک آف انگلینڈ کی مانیٹری پالیسی کمیٹی کے 9 میں سے 8 اراکین کی جانب سے شرح سود میں کمی کے فیصلے کی حمایت کی گئی۔
بینک آف انگلینڈ کے فیصلے کے بعد شرح سود 5 فیصد سے کم ہوکر 4.75 فیصد تک پہنچ گئی، یہ رواں سال کے دوران شرح سود میں کی جانے والی دوسری کمی ہے۔
واضح رہے کہ اس سے قبل 2024 میں اگست کے ماہ میں شرح سود میں 0.25 فیصد کمی کی گئی تھی جو کہ 2020 کے بعد پہلی بار کی گئی تھی۔
مانیٹری پالیسی کمیٹی کے مطابق برطانیہ میں ستمبر 2024 میں مہنگائی بڑھنے کی شرح 1.7 فیصد رہی جبکہ شرح سود میں کمی کا فیصلہ مہنگائی کی سطح میں کمی کو دیکھتے ہوئے کیا گیا ہے۔
2021 کے بعد پہلی باریوکے میں مہنگائی کی شرح 2 فیصد کے ہدف سے نیچے آئی
مانیٹری پالیسی کمیٹی کا کہنا ہے کہ اگر مہنگائی کی شرح مستحکم رہی تو شرح سود میں مزید کمی کی جاسکتی ہے۔
دوسری جانب بینک آف انگلینڈ کا کہنا ہے کہ 2025 میں مہنگائی کی شرح میں معمولی اضافے کا امکان ہے اور وہ 2.75 فیصد تک جا سکتی ہے
