امریکہ کی اپنی پالیسیاں، ہمارے معاملات میں مداخلت نہیں کریگا: چوہدری شجاعت

 لاہور(کامرس رپورٹر )مسلم لیگ ق کے صدر چوہدری شجاعت حسین نے کہا ہے کہ امریکہ کی نئی قیادت کی پاکستان کے امور میں مداخلت کے بارے افواہیں بے بنیاد ہیں۔ذرائع کے مطابق مسلم لیگ ق کے صدر چوہدری شجاعت حسین سے چین کے سرمایہ کاروں کے وفد نے سکارلٹ ژیانگ کی سربراہی میں ان کی رہائش گاہ پر ملاقات کی۔ملاقات میں مسلم لیگ ق کے صدر کا کہنا تھا کہ امریکہ کی اپنی پالیسیاں ہیں، وہ ہمارے معاملات میں مداخلت نہیں کرے گا۔ چین بھی اس حوالے سے واضح موقف رکھتا ہے۔ چین اور پاکستان کے مابین گہرے دوستانہ مراسم اور تجارتی تعلقات قائم ہیں۔ملاقات میں صوبائی وزیر چوہدری شافع حسین بھی موجود تھے۔ ملاقات میں امریکا میں ہونے والے انتخابات، نتائج، چین کی پالیسی اور دیگر امور پر بھی بات چیت ہوئی۔چودھری شجاعت حسین کا کہنا تھا کہ  پاکستان اور چین کے درمیان اقتصادی تعاون بڑھایا جائے گا۔چین کی جانب سے پاکستان اور پنجاب میں نئے پروگرام شروع کرنے پر مشکور ہیں۔ 3 لاکھ افراد کو تربیت کی فراہمی اور گجرات میں میڈیکل سٹی کے مجوزہ منصوبے پر بھی چین کا شکریہ ادا کرتے ہیں ۔ان کا مزید کہنا تھا کہ ہمیں ایگریکلچر سیکٹر کے فروغ کیلئے چین کی ٹیکنالوجی سے فائدہ اٹھانا چاہیے۔ دونوں جانب کے پرائیویٹ سیکٹر میں بھی اشتراک بڑھانے کی ضرورت ہے۔