اسمارٹ فون کی بیٹری دھماکے سے پھٹنے کے واقعات سامنے آتے رہتے ہیں لیکن کبھی آپ نے سنا ہے کہ آئی فون دھماکے سے پھٹ گیا ہو یقیناً آپ کا جواب نہیں ہوگا۔
چین کے شانکسی صوبے سے تعلق رکھنے والی خاتون نے دعویٰ کیا ہے کہ اس کا آئی فون 14 پرو میکس اس وقت پھٹ گیا جب وہ اسے رات بھر چارج پر لگا کر سو گئی تھی۔
خاتون نے بتایا ہے کہ آئی فون دھماکے سے پھٹنے کے نتیجے میں اس کا ہاتھ جھلس گیا۔
چینی خاتون کے مطابق دھماکے سے لگنے والی آگ سے کمبل اور کمرے کا کچھ حصہ بھی جل گیا، واقعے کی تصاویر بھی سوشل میڈیا پر وائرل ہورہی ہیں جس میں آئی فون کی حالت دیکھی جاسکتی ہے۔
رپورٹ کے مطابق خاتون نے آئی فون پرو میکس 2022 میں خریدا تھا اور اس کی وارنٹی ختم ہوچکی تھی تاہم خاتون نے اپیل سے اس کی وضاحت طلب کی ہے۔
ایپل کے نمائندے کا کہنا ہے کہ وہ واقعے کی انکوائری کررہے ہیں حالانکہ ڈیوائس کی وارنٹی ختم ہوچکی ہے، خاتون ناقص فون واپس کردے تاکہ وہ جان سکیں کہ اس کی وجہ کیا ہے۔
ایپل کا کہنا ہے کہ ہماری جانب سے صارفین کی حفاظت کو ترجیح دی جاتی ہے۔