قومی بیس بال فیڈریشن کا انٹرنیشنل پریمیئر لیگ کرانے کا اعلان

لاہور (سپورٹس رپورٹر) قومی بیس بال چیمپئن شپ کل سے شروع ہو گی۔ فیڈریشن نے دس ممالک کو پاکستان بلا کر انٹرنیشنل پریمئیر لیگ کرانے کا بھی اعلان کردیا ہے۔ سیکرٹری قومی بیس بال فیڈریشن خاور شاہ نے پنجاب کے نو منتخب صدر معظم خان اور سیکرٹری شیخ مظہر کے ہمراہ لاہور میں پریس کانفرنس کرتے ہوئے کہا کہ حکومت فنڈز فراہم نہیں کرتی۔ تمام اخراجات فیڈریشن خود برداشت کرتی ہے۔ خاور شاہ نے کہا کہ قومی بیس بال چیمپئن شپ دس سے چودہ اکتوبر تک لاہور میں ہوگی۔ چیمپئن شپ کے بعد آئندہ ماہ ویسٹ ایشیا الیون کپ کا انعقاد کیا جائے گا۔ انٹرنیشنل پریمیئر لیگ کے انعقاد کیلئے کوشاں ہیں۔ شرکت کیلئے دس ممالک کو دعوت دی جائے گی۔ بیس بال فیڈریشن پنجاب کے نئے صدر نے مارچ 2014ءمیں صوبائی چیمپئن شپ کرانے کا اعلان بھی کر دیا۔