پریکٹس میچ : پاکستانی باولرز پہلے دن ناکام، جنوبی افریقہ کے 5 وکٹوں پر 332 رنز

شارجہ (سپورٹس ڈیسک) جنوبی افریقہ نے پاکستان اے ٹیم کے خلاف پریکٹس میچ کے پہلے روز کھیل کے اختتام تک 5 وکٹوں کے نقصان پر 332 رنز بنا لئے۔ اے ٹیم کے کپتان عمر امین نے ٹاس جیت کر پہلے فیلڈنگ کا فیصلہ کیا جو سودمند ثابت نہ ہو سکا۔ پاکستانی کھلاڑی پہلی وکٹ جلدی حاصل کرنے میں کامیاب ہو گئے تاہم بعدازاں مہمان بلے بازوں نے ان کی ایک نہ چلنے دی۔ کپتان گریم سمتھ جوکہ کافی عرصہ انجری کے بعد میچ کھیل رہے تھے، ناکام رہے۔ وہ صرف 2 رنز بنا کر ایل بی ڈبلیو آ¶ٹ ہو گئے۔ پیٹرسن اور ہاشم آملہ نصف سنچریاں مکمل کرکے ریٹائرڈ ہرٹ ہوئے۔ پیٹرسن نے 58 اور آملہ نے 58 رنز کی اننگز کھیلی۔ کیلس 70 اور اے بی ڈویلیئرز 58 رنز بنا کر آ¶ٹ ہوئے۔ جین پال ڈومینی 49 اور پلیسس 25 رنز بنا کر کھیل رہے ہیں۔ احسان عادل، عثمان قادر اور شعیب مقصود نے ایک ایک وکٹ حاصل کی۔