ملتان (آئی این پی) ملتان میں عیدالاضحی کی نماز  کے بعد  شہریوں نے پی ٹی آئی کے سابق صدر جاوید ہاشمی کو گھیر لیا، داغی داغی، لوٹا اورگو نواز گو کے نعرے لگائے‘ جاوید ہاشمی مظاہرین کی شدید نعرے بازی کی وجہ سے میڈیا سے بات نہ کرسکے‘ مظاہرین نے  آدھ گھنٹہ ان کو گھیرے رکھا ‘ ان کی گاڑی پر لوٹے پھینکے‘  مظاہرین کی  نعرہ بازی پر جاوید ہاشمی سخت غصے میں دکھائی دیئے اور  بار بار  مکا لہراتے رہے تاہم اس کے بعد وہ وہاں سے  گھر  چلے گئے۔ مخدوم جاوید ہاشمی نے میڈیا سے بات شروع ہی تھی کی کہ وہاں موجود لوگوں نے داغی، داغی، لوٹا لوٹا اور گو نواز گو کے نعرے لگانا شروع کر دیئے جس کی وجہ سے جاوید ہاشمی اپنی بات جاری نہ رکھ سکے اور گاڑی کی طرف چلے گئے۔ اس دوران کارکن نعرے بازی کرتے ہوئے ان کی گاڑی کے گرد جمع ہو گئے اور گو نواز گو، داغی داغی کے نعرے لگاتے رہے، کارکنوں کے گاڑی کو تھپڑ اور مکے پڑنے پر جاوید ہاشمی مکا لہراتے ہوئے گاڑی سے باہر آ گئے اور مظاہرین کے حصار کے اندر چلے گئے۔ مظاہرین گو نواز گو اور داغی داغی کے نعرے لگاتے رہے تو جاوید ہاشمی بھی ہاتھ لہرا لہرا کر نعرے لگاتے رہے۔ معاملہ بگڑتا دیکھ کر وہاں موجود سکیورٹی اہلکار اور ان کے حامیوں نے انہیں دوبارہ گاڑی میں بیٹھنے پر اصرار کیا تو وہ اپنی گاڑی میں بیٹھ گئے۔ ان کے ڈرائیور نے گاڑی ہجوم سے نکال لی اور گھر چلے گئے۔ بعدازاں گھر جاکر پریس کانفرنس کی۔