بہاولپور(آئی این پی)باسکٹ بال میچ ہارنے کا سارا غصہ طالبات نے مخالف ٹیم پر نکال دیا۔ ماردھاڑ کے دوران سات لڑکیاں زخمی ہوگئیں ۔بہاولپور میں لڑکیوں کا باسکٹ بال ٹورنامنٹ پچپن منٹ تک سنسنی خیزمرحلے میں رہا۔ دونوں ٹیموں نے ڈٹ کرایک دوسرے کا مقابلہ کیا اور آخری پانچ منٹوں میں کمپری ہینسیو اسکول کی طالبات نے دو پوائنٹ اسکور کیے تو صادق اسکول کی ٹیم آٹ آف کنٹرول ہوگئی ۔ہارنے والی ٹیم کے جارحانہ انداز پر طالبات کے دونوں گروپس ایسے لڑے کہ ریسکیو کو بلانا پڑا۔ اسی مار دھاڑ کے دوران سات لڑکیاں زخمی ہو گئیں جنہیں ابتدائی طبی امداد کے بعد گھروں کو بھیج دیا گیا۔انتظامیہ کے مطابق ڈسپلن کی خلاف ورزی پر طالبات سے جواب دہی کی جائے گی۔