ترکی ، ایران، یمن سمیت مختلف ملکوں میں جشن ، اظہار یکجہتی ، ریلیاں

 تہران+ استنبول( نوائے وقت رپورٹ) حماس کے اسرائیل پر منظم اور کامیاب حملے کے بعد فلسطینیوں نے مختلف علاقوں میں جشن منایا، غزہ میں اسرائیل کے تباہ شدہ ٹینک اور موبائل پر کھڑے ہوکر نوجوانوں نے نعرے لگائے۔اس کے علاوہ ایران میں بھی حماس کے حملوں پر جشن کا سماں ہے، تہران میں فلسطین اسکوائر پر آتش بازی کی گئی جبکہ ترکیہ کے شہر استنبول میں بھی اظہار یکجہتی کی ریلی نکالی گئی۔ریلی میں ہزاروں افراد نے شرکت کی اور مظاہرین نے ہاتھوں میں فلسطین اور مزاحمتی تحریک حماس کے پرچم اٹھا رکھے تھے۔یمن کے دارالحکومت صنعا میں بھی فلسطینیوں کی حمایت میں ہزاروں افراد نکل آئے اور اسرائیل پر ہونے والے حملوں پر جشن منایا۔یمن کے علاوہ عراق اور اردن سمیت دنیا کے کئی ملکوں میں حماس کی حمایت میں مظاہرے ہوئے ہیں۔