شہباز شریف کی ملاقات، اگلے ماہ واپسی، ملک خوشحالی کی طرف لے جائیں گے: نواز شریف

لندن+راولپنڈی (نمائندہ خصوصی +نوائے وقت رپورٹ+اپنے سٹاف رپورٹر سے) شہباز شریف نے لندن میں نواز شریف سے ملاقات کی۔ نواز شریف نے وطن واپسی سے متعلق گفتگو کی۔ سیاسی صورتحال پر بھی غور کیا گیا۔ نواز شریف کی وطن واپسی کیلئے لاہور ائرپورٹ کو فائنل کر دیا گیا۔ پاکستان پہنچنے پر نواز شریف راہداری ضمانت لے سکتے ہیں۔ نواز شریف کو تجویز دی گئی کہ واپسی پر داتا دربار جائیں۔ ملاقات میں تجویز دی گئی کہ نواز شریف کارکنوں سے خطاب کے بعد رائے ونڈ روانہ ہوں۔ دوسری جانب نواز شریف نے لندن میں کارکنوں سے ملاقات کی۔ نواز شریف نے کہا کہ اگلے ماہ پاکستان واپس آ رہا ہوں۔ پاکستان کو خوشحالی کی طرف لے کر جائیں گے۔ چند افراد نے مخصوص مقاصد کیلئے پاکستان کو نشانہ بنایا۔راولپنڈی سے اپنے سٹاف رپورٹر سے کے مطابق نواز شریف نے کہا ہے کہ راولپنڈی مسلم لیگ ن کا مضبوط قلعہ ہے۔ سینیٹر چوہدری تنویر خان اور بیرسٹر دانیال چوہدری ہماری پارٹی کا قیمتی اثاثہ ہیں۔ ان کی پارٹی کیلئے خدمات اور قربانیاں ناقابل فراموش ہیں۔ مشرف اور نیازی کے مشکلات بھرے ادوار میں بھی اپنے موقف پر قائم رہ کر انہوں نے ثابت کیا کہ ہم ذاتی مفادات کی بجائے عوام کی خدمت کی سیاست کرتے ہیں۔ این اے 62 راولپنڈی پر بیرسٹر دانیال چوہدری ہی ہمارے امیدوار ہیں، الیکشن مہم شروع کریں۔ میں جلد پاکستان آکر اس مہم کی قیادت کروں گا۔ دانیال پیلس سے جاری بیان کے مطابق ان خیالات کا اظہار انہوں نے گزشتہ روز لندن میں اپنی رہائشگاہ پر ملاقات کیلئے آنے والے پارٹی رہنماﺅں سینیٹر چوہدری تنویر خان اور بیرسٹر دانیال چوہدری سے بات چیت کرتے ہوئے کیا۔