لاہور(سپورٹس رپورٹر) چیمپئنز ون ڈے کپ 2024 کے ابتدائی پریکٹس میچ میں لائنزسکواڈ نے پینتھرز کو231 رنز سے بڑی شکست دیدی۔لائنز سکواڈ نے پہلے بیٹنگ کرتے ہوئے 50 اوورز میں 398 رنز بنائے ، امام الحق نے 114 گیندوں پر 178 رنز کی دھواں دھار اننگز کھیلی ، پینتھرز کی جانب سے عماد بٹ نے 3اور محمد حسنین نے 2وکٹیں حاصل کیں۔ہدف کے تعاقب میں پینتھرز کی پوری ٹیم 167 رنز پر ڈھیرہوگئی، رضوان محمود 58 رنز بنا کر نمایاں رہے، پینتھرز کے 7 کھلاڑی ڈبل فگر میں داخل نہ ہوسکے ، لائنز کی جانب سے فیصل اکرم نے3اور عامر یامین نے 2وکٹیں حاصل کیں۔دوسرا پریکٹس میچ آج وولوز اور ڈولفنزکے درمیان کھیلا جائیگا۔چیمپئنز ون ڈے کپ کے حوالے سے فیصل آباد کے بوہڑاں والی گراؤنڈ اور اقبال سٹیڈیم میں ٹیموں کے پریکٹس سیشن تیسرے روز بھی جاری رہے۔ اس موقع پر پاکستان ٹیم کے سٹار بیٹرز سعود شکیل، سابق کپتان سرفراز احمد، آصف علی، فہیم اشرف اور دیگر کھلاڑی پریکٹس سیشن میں شریک ہوئے۔ وکٹ کیپر بیٹر محمد رضوان، فخر زمان، افتخار احمد سمیت دیگر کئی کھلاڑی پریکٹس سیشن میں مصروف نظر آئے۔