فیصل آباد: کئی گھروں میں ڈاکے، ڈلیوری بوائے سمیت متعدد راہگیر لٹ گئے 

فیصل آباد (نمائندہ خصوصی) ڈاکوئوں  نے پانچ شہریوں کے اہل خانہ کو یرغمال بنا کر لاکھوں کے زیورات‘ نقدی اور قیمتی سامان چھین کر فرار ہو گئے۔ جبکہ ڈلیوری بوائے سے پیزا‘ نقدی چھین لی۔ تفصیلات کے مطابق تھانہ ساندل بار کے علاقہ 57 ج ب میں ڈاکو گزشتہ شب پہلے شاہد خان کے گھر داخل ہو کر اہل خانہ کو یرغمال بنا کر کمرہ میں بند کر کے لاکھوں کے زیورات‘ نقدی‘ قیمتی سامان لوٹنے کے بعد اس کے ہمسائے اشفاق کے گھر داخل ہو کر اہلخانہ کو یرغمال بنا کر لاکھوں کے زیورات‘ نقدی لوٹنے کے بعد جاتے ہوئے موٹرسائیکل بھی لے گئے۔ تھانہ صدر کے علاقہ ہمایوں نگر میں سلطان محمود‘ گلشن سبحان کالونی میں محمد علی کے گھر داخل ہونیوالے ڈاکو لاکھوں لوٹ کر فرار ہو گئے اور لنڈیانوالہ کے علاقہ میں اختر کا گھر لوٹ لیا گیا۔ علاوہ ازیں ڈی ٹائپ کالونی میں موٹرسائیکل سوار ڈاکو ڈلیوری بوائے ثقلین  سے  پیزا‘ 5ہزار روپے اور فون چھین کر فرار ہو گئے۔