وہ کرو جس کے بارے میں جانتے ہو، عمر عبداللہ نیبھارتی کرکٹرگوتم گمبھیر کوآئینہ دکھا دیا

لاہور (سپورٹس ڈیسک) مقبوضہ جموں و کشمیر کے سابق وزیر اعلی عمر عبداللہ کے بیان پر تنقید کرنا سابق بھارتی کرکٹر اور بی جے پی کے رہنما گوتم گمبھیر کو مہنگا پڑ گیا، عمر عبداللہ نے سابق کرکٹر کو آئینہ دکھادیا۔ گوتم گمبھیر نے سوشل میڈیا ویب سائٹ ٹویٹر پر لکھا کہ عمر عبداللہ مقبوضہ جموں و کشمیر کے لیے علیحدہ وزیر اعظم چاہتے ہیں اور میں سمندر پر اڑنا چاہتا ہوں، عمر عبداللہ مقبوضہ جموں کشمیر کے لیے علیحدہ وزیر اعظم چاہتے ہیں اور میں سوروں کو اڑتا دیکھنا چاہتا ہوں، علیحدہ وزیر اعظم سے زیادہ عمر عبداللہ کو نیند اور پھر عمدہ کافی کی ضرورت ہے، اگر پھر بھی انہیں کچھ سمجھ نہ آئے تو انہیں سبز پاسپورٹ دے دینا چاہیے۔ گوتم گمبھیر کو جواب دیتے ہوئے عمر عبداللہ نے ٹویٹ کیا کہ گوتم، میں نے زیادہ کرکٹ نہیں کھیلی کیوں کہ میں جانتا تھا کہ میں کبھی اچھا کرکٹر نہیں بن سکوں گا، آپ بھی مقبوضہ جموں و کشمیر، اس کی تاریخ اور جموں کشمیر نیشنل کانفرنس کے بارے میں کچھ نہیں جانتے ہیں لیکن پھر بھی آپ نے اس علاقے کے بارے میں اپنی کم علمی دنیا کو دکھانے پر اصرار کیا، وہی کرو جس کے بارے میں زیادہ جانتے ہو، آئی پی ایل کے بارے میں ٹویٹ کرو۔ یاد رہے کہ عمر عبداللہ اس سے قبل بھارتی وزیر اعظم نریندر مودی کی پالیسیوں کو بھی شدید تنقید کا نشانہ بنا چکے ہیں۔