ترک فضائیہ کے  کمانڈر  جنرل حسن کیچیکا کیاز نے ایئر  ہیڈ کوارٹر اسلام آباد دو دورہ کیا  ، پاک فضائیہ کے سربراہ نے معز ز مہمان کا استقبال کیا ، سلامی بھی پیش کی گئی ۔ تفصیلات کے مطابق  ترک فضائیہ کے ایک وفدنے   کما نڈر ترک فضائیہ  جنرل حسن کیچیکاکیاز کی سربراہی میں ائیر ہیڈ کوارٹرز اسلام آباد کا دورہ کیا۔ایئر ہیڈ کوارٹر اسلام آبادآمد پر پاک فضائیہ کے سربراہ ائیرچیف مارشل مجاہد انور خان نے معزز مہمان کا استقبال کیا، پاک فضائیہ کے ایک چاق وچوبند دستے نے انہیں سلامی پیش کی۔معزز مہمان نے پاک فضائیہ کے شہدا کو خراجِ عقیدت پیش کرنے کے لئے یاد گارِ شہدا پر پھولوں کی چادر چڑھائی۔بعد ازاں کمانڈر ترک فضائیہ نے پاک فضائیہ کے سربراہ سے انکے آفس میں ملاقات کی اوراس دوران علاقائی سلامتی اور باہمی تعاون کے امور پر تبادلہ خیال کیاگیا۔پاک فضائیہ کی پیشہ ورانہ مہارت کو سراہتے ہوئے کمانڈر ترک فضائیہ نے حالیہ سالوں میں پاک فضائیہ کی خود انحصاری کے میدان میں غیر معمولی ترقی کی تعریف کی۔پاک فضائیہ کے سربراہ نے کہا کہ دونوں برادر ممالک کے درمیان غیر متزلزل تعلقات اس بات کے غماز ہیں کہ ترکی نے ہر مشکل گھڑی میں پاکستا ن کا ساتھ دیا ہے۔دونوں معزز شخصیات نے فضائی افواج کے درمیان بے مثال دوستانہ تعلقات کو نئی جہتوں سے روشناس کرانے کے عزم کا اعادہ کیا۔