ایک کالم صدر فلم فیڈریشن کے لئے 

زندگی سچائیوں اور حقیقتوں کے درمیان پنپتی ایک ایسی کہانی ہے کہ ہر کوئی اس کو اپنے فن اور ہنر کے ساتھ اس کی وضاحت کرتا ہے ایک مصور برش کی مدد سے گلکاریاں کرتا ہے تو شاعر لفظوں کے سہارے سے اس کی سچائیاں وضع کرتا ہے اسپینسر کے نزدیک زندگی مہارت سے استعمال کیا گیا وہ تحفہ ہے کہ کامیابیاں مقدر بن جاتی ہیں اور ذرا سی بے احتیاطی ناکامی کا شاخسانہ بن جاتی ہے جبکہ ایک مفکر نے زندگی کو سٹیج قرار دیا جہاں ہر شخص اپنا کردار ادا کرکے چلا جاتا ہے فنکار چاہے مصور ہو شاعر ہو یا فلم سٹار بہت حساس ہوتا ہے صدر فلم فیڈریشن فلم سٹار شاہد اس ضمن میں کہتے ہیں ایک فنکار چونکہ زندگی کی حقیقتوں کو قریب سے دیکھتا ہے ان کو محسوس کرتا ہے اور اسی کرب کو اپنے فن میں سموتا ہے جو عام آدمی کا دکھ ہے لہٰذا عام آدمی کا دکھ بھی اس کا دکھ بن جاتا ہے۔ گزشتہ دنوں انہوں نے بحیثیت صدر فلم فیڈریشن تمام فنکاروں کی جانب سے وزیراعظم عمران خان کی کرونا کے مرض سے صحت یابی کی دعا کی اور خاتون اول کے لئے بھی دعا فرمائی وہ کہتے ہیں کہ عمران خان ایک قیمتی سرمایہ ہیں انہوں نے یہ بھی کہا کہ عوام کو ان تمام ایس او پیز پر عمل کرنا چاہئے جن سے اس موذی مرض سے نمٹا جائے۔ انہوں نے عمران خان سے اپیل بھی کی کہ وہ لوگ جو فلم انڈسٹری میں کرونا کی وجہ سے بیروزگار ہوئے یا ایسے فنکار جنہوں نے فلم انڈسٹری میں یادگار نقوش چھوڑے اور بعد میں نامساعد حالات کا شکار ہوئے ان کی زندگی میں یا بعد میں ان کے اہل وعیال کی کفالت کیلئے ان کی مدد کی جائے وہ کہتے ہیں کہ بحران انفرادی اجتماعی اور سیاسی زندگی کا حصہ ہیں باہمی اتفاق اور مسلسل جدوجہد سے ان آزمائشوں سے نکلا جا سکتا ہے بقول شاعر
تھکیں جو پاؤں تو چل سر کے بل نہ ٹھہر آتش 
گل مراد ہے منزل میں خار راہ میں ہے
 فلمسٹار شاہد نے اپنے دور میں لازوال فلمیں فلم انڈسٹری کو دے کر نہ صرف اپنی قابلیت سے بڑے اداکاروں کے درمیان خود کو منوایا بلکہ آنے والے اداکاروں کے لئے راہیں بھی متعین کیں ان کی فلموں میں آنسو تہذیب امراؤ جان ادا ثریا بھوپالی قابل ذکر ہیں وہ ایک دردمند اور حساس دل رکھتے ہیں ہم سب امید رکھتے ہیں کہ ان کی سربراہی میں ایک بار پھر اچھی اور معیاری فلمیں پردہ سکرین کی زینت بن سکیں گی۔ ایک سوال کے جواب میں انہوں نے کہا کہ تبدیلی درحقیقت محنت اور لگن کا دوسرا نام ہے اس سے زندگی کے ہر میدان میں تبدیلی لائی جاسکتی ہے چاہے وہ معاشی پہلو ہوں، سیاسی یا فلم انڈسٹری وہ پاکستان کے لئے بھی پرامید ہیں کہ وہ منزل ضرور حاصل کرے گا جس کا خواب قائد نے دیکھا تھا۔
٭…٭…٭