گوجرانوالہ:43لاکھ 93 ہزارآٹے کے تھیلے مفت تقسیم کئے جاچکے

گوجرانوالہ (نمائندہ خصوصی)گوجرانوالہ ڈویژن میں مفت آٹے کی تقسیم کا عمل خوش اسلوبی سے جاری ہے اب تک مفت آٹا پیکیج کے تحت گوجرانوالہ ڈویژن میں آٹے کے 43لاکھ 93 ہزار سے زائد تھیلے تقسیم کئے جاچکے ہیں۔ کمشنر گوجرانوالہ ڈویژن نوید حیدر شیرازی نے کہا ہے کہ عوام الناس کی سہولت کیلئے ڈویژن بھر میں 155 ٹرکنگ پوائنٹس اور 1997 کا¶نٹرز بنائے گئے ہیں‘ڈپٹی کمشنرزاور دیگر افسران تمام پوائنٹس کی مسلسل مانیٹرنگ کررہے ہیں اور آٹے کی تقسیم کا عمل با سہولت انداز میں جاری ہے۔ انہوں نے کہا کہ گوجرانوالہ ڈویژن کے 17 لاکھ47ہزار سے زائد خاندان مفت آٹا پیکیج کے اہل ہیں۔رمضان المبارک کے دوران مجموعی طور پر52 لاکھ41 ہزار تھیلے تقسیم کئے جائیں گے جس کےلئے حکومت پنجاب اب تک 172 فلور ملو ں کو 52ہزار 146 میٹرک ٹن گندم فراہم کرچکی ہے۔