جب بھی موقع ملا تو اچھا کھیلنے کی کوشش کروں گا: زمان خان

لاہور(سپورٹس رپورٹر)پاکستان کرکٹ ٹیم کے فاسٹ بائولر زمان خان نے کہا ہے کہ احسان اللہ سمیت سب بائولرز اچھے ہیں، یہ مینجمنٹ کو دیکھنا ہے کس کو کھلانا ہے،مجھے جب بھی موقع ملا تو اچھا کھیلنے کی کوشش کروں گا۔سینئر کھلاڑی ساتھ ہوں تو اعتماد بڑھتا ہے، ان کی موجودگی میں اب اچھی کارکردگی ہو گی، شارجہ میں پچز نئی تھیں بیٹرز اچھا نہیں کھیل سکے، افغانستان کیخلاف سیریز اچھی رہی ہار جیت ہوتی رہتی ہے۔ ٹارگٹ یہی ہے کہ پاکستان کیلئے جتنا زیادہ ہو سکے کھیلوں اور اچھا پرفارم کروں۔ لاستھ مالنگا کو شروع سے دیکھتا آ رہا ہوں، ان کو دیکھنا ڈیتھ اوورز میں مجھے کام آیا، آخری اوورز کرنے کیلئے بہت محنت کی ہے، پاکستان سپر لیگ میں اسی وجہ سے میرے آخری اوورز بھی اچھے ہوئے۔ جب میں لاہور قلندرز میں آیا تو مجھے بہت سپورٹ ملی، شاہین آفریدی اور حارث رؤف سے بہت سیکھا ہے، لاہور قلندرز کیساتھ جتنی محنت کی اس کا بتا نہیں سکتا۔ جب ٹیپ بال کھیلتا تھا تو شاہد آفریدی اور شعیب اختر کو دیکھتا تھا، تب سوچتا تھا کہ ان کی طرح بننا ہے، عمر گل لیجنڈ ہیں ان سے بہت سیکھ رہا ہوں، ان کے ساتھ مل کر ڈیتھ اوورز میں مزید اچھی بائولنگ کی کوشش کر رہا ہوں۔