نیوزی لینڈ کیخلاف سیریز، 17 رکنی قومی کرکٹ سکواڈ کا اعلان، عامر، عماد کی واپسی

لاہور(سپورٹس رپورٹر) پاکستان کرکٹ بورڈ کی قومی سلیکشن کمیٹی نے نیوزی لینڈ کیخلاف پانچ ٹی ٹونٹی میچوں کی سیریز کیلئے پاکستان کی 17 رکنی ٹیم کا اعلان کردیا ہے ۔ بابر اعظم ٹیم کی قیادت کرینگے ،دو نئے کھلاڑی عثمان خان اور عرفان خان پہلی بار پاکستان ٹیم میں شامل کیے گئے ہیں، محمد عامر اور عماد وسیم کی ٹیم میں واپسی ہوئی ہے ۔قومی سلیکشن کمیٹی نے قذافی سٹیڈیم لاہور میں بابراعظم کی قیادت میں17 رکنی ٹیم کے علاوہ 5 ریزرو کھلاڑیوں کے ناموں کا اعلان بھی کیا ہے۔ پانچ میچوں کی ٹی ٹونٹی سیریز  18  سے 27 اپریل تک راولپنڈی اور لاہور میں کھیلی جائیگی۔ یہ سیریز پاکستان کرکٹ ٹیم کی امریکہ اور ویسٹ انڈیز میں ہونیوالے ٹی ٹونٹی ورلڈ کپ کی تیاریوں کا حصہ ہے۔ سیریز کے بعد پاکستان کرکٹ ٹیم انگلینڈ اور آئرلینڈ کے دورے میں بھی ٹی ٹونٹی میچوں کی سیریز کھیلے گی۔پاکستان ٹیم میں پہلی مرتبہ شامل ہونیوالے 28 سالہ عثمان خان اس سے قبل متحدہ عرب امارات میں کھیلتے رہے ہیں۔وہ گزشتہ دو سال سے پاکستان سپر لیگ میں شاندار پرفارمنس دیتے رہے ہیں۔ گزشتہ سال انہوں نے ملتان سلطانز کی طرف سے کوئٹہ گلیڈی ایٹرز کے خلاف پی ایس ایل کی تاریخ کی تیز ترین سنچری صرف  36گیندوں پر بنائی تھی۔ اس سال بھی انہوں نے پی ایس ایل میں دو سنچریوں اور دو نصف سنچریوں کی مدد سے 430 رنز سکور کیے۔ 21سالہ عرفان خان کی ٹیم میں شمولیت ڈومیسٹک کرکٹ اور پاکستان سپر لیگ میں عمدہ کارکردگی کی بنیاد پر عمل میں آئی ہے۔وہ اس سال پی ایس ایل میں کراچی کنگز کی طرف سے کھیلتے ہوئے ٹورنامنٹ کے بہترین فیلڈر اور بہترین ایمرجنگ کرکٹر قرار پائے تھے جبکہ پریذیڈنٹ ٹرافی میں سٹیٹ بینک کی طرف سے کھیلتے ہوئے انہوں نے چھ اننگز میں 455 رنز سکور کیے تھے۔ وہ فرسٹ کلاس کرکٹ میں ایک سنچری بھی سکور کرچکے ہیں جبکہ ٹی ٹونٹی مقابلوں میں ایک نصف سنچری بنائی ہے۔عرفان خان 2020 اور 2022 میں انڈر19 ورلڈ کپ میں بھی پاکستان کی نمائندگی کرچکے ہیں۔فاسٹ بائولر محمد عامر اور عماد وسیم کی انٹرنیشنل کرکٹ میں واپسی ہوئی ہے۔پاکستان ٹیم میں بابراعظم ( کپتان )،صائم ایوب،محمد رضوان،عثمان خان،افتخار احمد،اعظم خان،عرفان خان نیازی،شاداب خان،عماد وسیم، شاہین شاہ آفریدی،نسیم شاہ،زمان خان،محمد عامر،عباس آفریدی، اسامہ میر، فخرزمان اور ابرار احمد شامل ہیں جبکہ ٹیم کے ریزرو کھلاڑیوں میں حسیب اللہ،محمد علی،صاحبزادہ فرحان،آغا سلمان اور وسیم جونیئر شامل ہیں۔