ٹریفک حادثات میں خاتون سمیت 2 افراد جاں بحق ‘ کھیتوں سے نعش بر آمد

سرائے مغل(نامہ نگار)ٹریفک حادثات میں خاتون سمیت 2 افراد جاں بحق اور دو افراد زخمی ہو گئے۔ کھیتوں سے نشئی کی نعش بر آمد ہوئی۔تفصیلات کے مطابق بلیر چک 46 کی بائیس سالہ ایمان فاطمہ اپنے رشتہ دار کے ساتھ موٹر سائیکل پر شیخم سے واپس گھر جا رہی تھی کہ راستے میں تیز رفتار ٹریکٹر ٹرالے کے ڈرائیور نے ٹکر مار دی جس کے نتیجے میں بائیس سالہ ایمان فاطمہ موقع پر جاں بحق ہو گئی اور اسکا رشتہ دار شدید زخمی ہو گیا۔۔ لاہور میں ملازمت کرنا والا عارف والا کا رہائشی ظہور احمد اور آصف علی موٹر سائیکل پر واپس عارف والا جا رہے تھے کہ ملتان روڈ پر جمبر کلاں کے قریب آگے جانے والے کنٹینر سے ٹکرا گئے اور سڑک پر گر جانے سے پچپن سالہ ظہور احمد موقع پر جاں بحق ہو گیا جبکہ اس کا ساتھی محمد آصف شدید زخمی ہو گیا۔زخمیوں کو ہسپتال منتقل کر دیا گیا۔ علاوہ ازیں نواحی گاؤں بھونکی موڑ کے ویران کھیتو ں سے چونتیس سالہ شخص کی نعش برآمد ہوئی۔ ریسکیو نے نعش کو تحصیل ہسپتال پہنچا دیا ۔