لاہور(سپورٹس رپورٹر+نمائندہ سپورٹس) تیسری ایشین انڈر 23 مینز والی بال چیمپیئن شپ میں پاکستان ٹیم نے قازقستان کو شکست دیکر پہلی مرتبہ سیمی فائنل کے لیے کوالیفائی کر لیا۔ پاکستان ٹیم نے میچ میں تین ایک سے کامیابی اپنے نام کی۔ میانمار میں جاری چیمپئن شپ میں گذشتہ روز پاکستان اور قازقستان کی ٹیموں کے درمیان میچ کھیلا گیا جس میں پاکستان ٹیم نے پہلے سیٹ میں 25-21 سے کامیابی حاصل کی۔ قومی ٹیم کے کھلاڑیوں نے دوسرے سیٹ میں بھی شاندار کھیل پیش کیا اور 25-18 سکور سے سیٹ جیت کر میچ میں دو صفر کی برتری حاصل کر لی۔ میچ کے تیسرے سیٹ میں قازقستان ٹیم نے کم بیک کرتے ہوئے پاکستان کو 25-17 سے مات دی جبکہ چوتھے سیٹ کامیابی حاصل کرکے میچ میں تین ایک سے کامیابی حاصل کر کے سیمی فائنل میں اپنی جگہ پکی کی۔ چیمپئن شپ میں یہ پاکستان کی مسلسل چھٹی کامیابی ہے۔