لاہور( سپورٹس رپورٹر+نمائندہ سپورٹس)پہلے ٹیسٹ کے اختتام پر قومی کرکٹ ٹیم آج سا ئوتھمپٹن روانہ ہوگی ،13 سے 17 اگست تک دوسرا ٹیسٹ میچ سا ئوتھمپٹن میں کھیلا جائیگا ،21 سے 25 اگست تک تیسرا ٹیسٹ بھی سائوتھمپٹن میں ہی ہوگا ،26 اگست کو ٹیم مانچسٹر روانہ ہوگی۔ ٹیسٹ کرکٹ میں پاکستان اور انگلینڈ کے درمیان اب تک کھیلی گئی سیریز میں انگلینڈ کا پلڑا بھاری ہے۔ انگلش ٹیم 10 جبکہ گرین کیپس 8 مرتبہ فاتح رہے، 9  سیریز برابر رہیں۔ پاکستان نے 1954ء میں پہلے ہی دورہ انگلینڈ میں سیریز 1-1 سے ڈرا کی، اگلی 5 میں سے 4 سیریز انگلش ٹیم نے جیتیں، 1982ء کے بعد 15 برس تک پاکستان نے انگلینڈ کو سیریز نہیں جیتنے دی۔ 2010ء کے بعد سے اب تک انگلینڈ، پاکستان کیخلاف کوئی بھی ٹیسٹ سیریز نہیں جیت سکا،گرین کیپس نے 2012 اور 2015ء میں یواے ای میں اسے مات دی۔ دونوں ٹیموں کے مابین انگلینڈ میں کھیلی گئیںدونوں سیریز ڈرا رہیں۔