لاہور(کلچرل رپورٹر)دا لٹل آرٹ کے زیر اہتمام بارہواں سالانہ”لاہور انٹرنیشنل چلڈرن فلم فیسٹیول“21 اگست سے شروع ہوگا۔ کورونا وباء کے پیش نظر رواں برس فیسٹیول کا انعقادآن لائن رکھا گیا ہے۔ 24ممالک سے158فلمیں دکھائی جائینگی۔  
بچوں کی تعلیم و تربیت اور معیاری تفریح کے مد نظر ہونے والے لاہورانٹرنیشنل چلڈرن فیسٹیول کے بارھویں سالانہ ایڈیشن کی تیاریاں مکمل کر لی گئی ہیں اور فیسٹیول کے منتظمین ”دا لٹل آرٹ“ نے60روز دورانئے پر محیط رنگا رنگ سالانہ ایڈیشن کے شیڈول کا اعلان کردیا ہے۔ فیسٹیول کے ڈائریکٹرشعیب اقبا ل نے بتایا ہے کہ”لاہور انٹرنیشنل چلڈرن فلم فیسٹیول“ میں رواں برس مجموعی طور پر16مختلف زبانوں پر مشتمل 158فلمیں دکھائی جائینگی جنہیں پروفیشنل فلم میکرز کے ساتھ ساتھ نوجوان طلبا و طالبات نے بنایا ہے اور ان میں شارٹ فلم، اینی میشن، لائیو ایکشن اور دستاویزی فلموں سمیت دیگر موضوعات کی حامل فکر انگیز کہانیاں شامل ہیں جن کا انتخاب دنیا کے 24مختلف ممالک سے بچوں کی معیاری تفریح کے پیش نظرخصوصی طور پر کیا گیا ہے۔ انہوں نے بتایا کہ فیسٹیول کا انعقاد دالٹل آرٹ اور معروف گروپ سنی پیکس کے خصوصی اشتراک کے ساتھ کیا گیاہے اور یہ فیسٹیول سٹارز پلے پر جمعہ اکیس اگست سے ہوگا۔ انہوں نے مزید بتایا کہ پاکستان نیشنل کونسل آف دی آرٹس، لوک ورثہ، والڈ سٹی لاہور اتھارٹی،الحمرا آرٹ کونسل، فیض گھر،انسٹیٹیوٹ فار آرٹ ایند کلچر، کنیئرڈ کالج اور ایمبیسی آف نید رلینڈسمیت دیگر ثقافتی اداروں کا اشتراک بھی فیسٹیول کو حاصل ہے۔