سی پیک کی دسویں سالگرہ پر سٹیٹ بینک 100 روپے کا یادگاری سکہ جاری کرے گا

سی پیک کی دسویں سالگرہ پر سٹیٹ بینک جمعے کے روز 100 روپے کا یادگاری سکہ جاری کرے گا۔ نجی ٹی وی کے مطابق100 روپے کا یادگاری سکے کے کنارے ابھرے ہوئے ہیں۔ سکّے کا قطر 30 ملی میٹر اور وزن 13.5 گرام ہے۔ اسے تانبے اور نکل دھات سے بنایا گیا ہے جس میں تانبہ 75 فیصد اور نکل 25 فیصد شامل ہے۔سکّے کے سامنے کی طرف وسط میں خوبصورتی سے بنایا ہوا پانچ کونوں والا بڑا ستارہ ہے۔ اس ستارے کے اندر دائیں طرف پاکستانی پرچم کے طرز کا ہلال اور ستارہ ہےاوربائیں طرف چینی پرچم کی طرح کا پانچ ستاروں کا جھرمٹ ہے، ستارے کے اوپر بالائی نصف دائرے میں انگریزی رسم الخط میں CELEBRATING 10 YEARS OF CPEC اور زیریں نصف دائرے میں اردو رسم الخط میں “اسلامی جمہوریہ پاکستان” کے الفاظ کندہ ہیں۔یہ سکہ 11 اگست 2023 ء سے ایس بی پی بینکنگ سروسز کارپوریشن کے کاؤنٹرز کے ذریعے فراہم کیا جائے گا۔