لاہور+میاں چنوں (سپورٹس رپورٹر+نامہ نگار) پیرس اولمپکس میں تاریخی کامیابی حاصل کرنے والے اتھلیٹ ارشد ندیم کی والدہ نے کہا کہ خوشی ہے کہ بیٹے نے ملک کا نام روشن کیا۔ پیرس اولمپکس کے جیولین تھرو ایونٹ میں پاکستان کو گولڈ میڈل جتوانے والے ارشد ندیم کی والدہ کا کہنا تھا کہ میں نے اپنے بیٹے کی کامیابی کے لیے بہت دعائیں کیں، خوشی ہے کہ بیٹے نے ملک کا نام روشن کیا۔ ارشد ندیم کی کامیابی پر ان کے گھر کے باہر جشن منایا گیا۔ اس موقع پر میڈیا سے گفتگو کرتے ہوئے ارشد ندیم کی والدہ کا کہنا تھا کہ پوری قوم نے بھی میرے بیٹے کی کامیابی کے لیے دعا کی۔ ان کا کہنا تھا کہ بیٹے کے استقبال کے لیے پھول لے کر جاؤں گی۔ اس موقع پر ارشد ندیم کی بہن کا کہنا تھا کہ اللہ تعالی نے میرے بھائی کی میڈل جیتنے کی دلی خواہش پوری کردی۔ ارشد ندیم کے بھائی نے کہا کہ کم وسائل کے باوجود ارشد ندیم نے ریکارڈ تھرو کی، حکومت سے بھی اپیل ہے کہ ارشد ندیم سے کیا وعدہ پورا کرے۔ ارشد ندیم کے بھائی نے کہا کہ حکومت گاؤں میں گراؤنڈ بنانے کا اپنا وعدہ پورا کرے۔ پیرس اولمپکس میں طلائی تمغہ جیتنے والے ارشد ندیم کے بھائی شاہد ندیم کا کہنا تھا کہ وسائل نہیں ہیں اور ہمیں پتا تھا ارشد کو وسائل کی نہیں دعاؤں کی ضرورت ہے۔ شاہد بتاتے ہیں کہ ارشد کو ہم گاؤں میں ’’روسی ٹریکٹر‘‘ بلاتے ہیں کہ اللہ نے اس میں بہت طاقت رکھی ہے۔ اس کی وضاحت کرتے ہوئے وہ بتاتے ہیں کہ باقی جتنے بھی ٹریکٹر ہوتے ہیں ان سب کی وزن کھنچنے کی ایک حد ہوتی ہے مگر روسی ٹریکٹر کی کوئی حد نہیں ہوتی۔علاوہ ازیں اولمپکس میں گولڈ میڈل جیتنے والے ارشد ندیم کی اہلیہ نے کامیابی پر پوری قوم کو مبارکباد دی ہے۔ انہوں نے کہا کہ ارشد ندیم نے گولڈ میڈل جیت کر قوم سے کیا وعدہ پورا کر دیا۔ گولڈ میڈل جیتنے پر خوشی ہے۔