ہنی ٹریپ کے ذریعے لوگوں سے رقم ہتھیانے والے گینگ کے 8 ارکان گرفتار  

لاہور (نامہ نگار) پولیس نے ہنی ٹریپ کے ذریعے لوگوں کو بلیک میل کرکے رقم ہتھیانے والے بین الاضلاعی گینگ کے 4 خواتین سمیت 8ملزمان گرفتار کر لئے ہیں۔ گرفتار ملزمان میں عقیل، آصف، اشرف، عظیم، عروج، کومل، عابدہ بی بی اور شمیم بی بی شامل ہیں۔ پولیس کے مطابق خواتین ملزم فون کر کے امیر لوگوں کو اپنے جال میں پھنساتیں اور ملنے کے لئے  بلاتیں، جہاں  مرد ساتھی ملزمان گن پوائنٹ پر لوگوں کی نازیبا ویڈیو بنا لیتے۔ پولیس کا کہنا ہے کہ ملزمان متاثرہ لوگوں کی ویڈیو بنانے کے بعد نقدی، موبائل فونز اور دیگر قیمتی سامان بھی چھین لیتے، ملزم متاثرہ شخص سے فون کروا کر  رقم منگواتے اور اپنے اکاؤنٹ میں ٹرانسفر کر لیتے۔ ملزم متاثرہ شخص سے مزید رقم ہتھیانے کے لیے متعلقہ تھانوں میں زنا  کی ایف آئی آر بھی درج کروا دیتے تھے۔