قائداعظم ٹرافی : لاہور بلیوز نے حیدرآباد کو اننگز سے شکست دیدی

لاہور(سپورٹس رپورٹر+نمائندہ سپورٹس) قائداعظم ٹرافی کے آخری راونڈ میچ میں لاہور بلیوز نے حیدرآباد کو میچ کے تیسرے ہی روز ایک اننگ اور 189رنز کے بڑے مارجن سے شکست دے کر سپر ایٹ کے مرحلے میں رسائی حاصل کر لی ہے۔ نیاز سٹیڈیم حیدر آباد میں کھیلے جانے والے میچ میں حیدر آباد ریجن نے پہلے اننگ میں 122اور دوسری اننگ میں 113رنز بنائے لاہور بلیوز نے واحد اننگ میں 8وکٹوں کے نقصان پر 424رنز بنائے تھے۔ اعزاز چیمہ نے میچ میں 10وکٹیں حاصل کیں اور وقاص سلیم نے 191رنز کی شاندار اننگ کھیل کر ٹیم کی فتح میں انتہائی اہم کردار ادا کیا۔ لاہور وائٹس نے راولپنڈی ریجن کی خلاف پہلی اننگز میں 21رنز کی سبقت حاصل کر لی ہے۔ لاہور وائٹس نے پہلی اننگ میں 201رنز بنائے جبکہ راولپنڈی ریجن پہلی اننگ میں 180رنز پر پویلین لوٹ گئی۔ آصف رضا نے 5وکٹیں حاصل کیں۔ برتری کے ساتھ لاہور وائٹس نے پوائنٹ ٹیبل پر تین قیمتی پوائٹس حاصل کر لیے ہیں اور اپنی پوزیشن مستحکم کر لی ہے۔