لاہور(سپورٹس رپورٹر+نمائندہ سپورٹس)انڈر 16 ایک روزہ ٹورنامنٹ کے دوسرے روز سنٹرل پنجاب اور سندھ نے اپنے اپنے میچز جیت لیے۔سعید اجمل کرکٹ گراؤنڈ فیصل آباد میں کھیلے گئے میچ میں سنٹرل پنجاب نے بلوچستان کو 6 وکٹوں سے شکست دے دی۔ بلوچستان کی ٹیم پہلے بیٹنگ کرتے ہوئے 108رنز بناکر آؤٹ ہوگئی۔ سنٹرل پنجاب کی جانب سے علی اسفند نے 4وکٹیں حاصل کیں۔ جواب میں سنٹرل پنجاب نے مطلوبہ ہدف 25 اوورز میں 4وکٹوں کے نقصان پر حاصل کرلیا۔ اوپنر آذان اویس 41 رنز کی ناقابل شکست اننگز کھیل کر نمایاں بیٹسمین رہے۔دوسری جانب بوہرانوالی گراؤنڈ فیصل آباد میں سندھ نے سدرن پنجاب کو 76رنز سے شکست دے دی۔ سندھ کی ٹیم نے پہلے بیٹنگ کرتے ہوئے مقررہ 45 اوورز میں 7وکٹوں کے نقصان پر 194 رنزبنائے۔ اوپنر مرزا سعد بیگ نے 125 گیندوں پر 100 رنز کی شاندار اننگز کھیلی۔ ہدف کے تعاقب میں سدرن پنجاب کی پوری ٹیم 118 رنز بناکر آؤٹ ہوگئی۔ عمر اعجاز نے3 وکٹیں حاصل کیں۔