ہم نے ہیلی کاپٹر سے 3افراد گرتے دیکھے جس میں سے ایک آدمی زندہ تھا اور اس نے ہم سے پانی مانگا‘جس آدمی سے میں نے بات کی تھی وہ جنرل بپن راوت ہی تھا‘حادثے کے بعد وہ ساری رات سو نہیں سکا
ہیلی کاپٹر حادثے میں ہلاک بھارتی چیف آف ڈیفنس جنرل بپن راوت سے بات کرنے والے عینی شاہد کی میڈیا سے گفتگو
بھارتی فضائیہ کے ہیلی کاپٹر حادثے میں ہلاک ہونے والے بھارتی چیف آف ڈیفنس اسٹاف جنرل بپن لکشمن سنگھ راوت نے ہیلی کاپٹر تباہ ہونے کے بعد زخمی حالت میں مقامی افراد سے بات چیت کی تھی۔ بھارتی میڈیا رپورٹس کے مطابق گزشتہ روز پیش آنے والے ہیلی کاپٹر واقعے کے ایک عینی شاہد شیو کمار نے دعویٰ کیا ہے کہ اس نے بھارتی جنرل بپن راوت کو پہاڑیوں سے ملبہ ملنے کے بعد زندہ دیکھا تھا۔ شیو کمار نے بھارتی میڈیا کو بتایا کہ وہ اپنے بھائی سے ملنے جارہا تھا کہ اسی دوران میرے سامنے ایک فوجی ہیلی کاپٹر گِر کر تباہ ہوا۔ عینی شاہد شیو کمار کے مطابق کہ اس نے ایئر فورس کے ہیلی کاپٹر کو آگ میں لپٹے اور گرتے دیکھا جس کے بعد وہ اور دیگر افراد امدادی کاموں کیلئے جائے وقوعہ پر پہنچ گئے۔ شیو کمار نے بھارتی خبر رساں ادارے کو بتایا کہ ہم نے ہیلی کاپٹر سے تین افراد گرتے ہوئے دیکھے جس میں سے ایک آدمی زندہ تھا اور اس نے ہم سے پانی مانگا۔عینی شاہد نے کہا کہ ہم نے چادر کی مدد سے اس شخص کو ملبے سے باہر نکالا جس کے بعد اس نے ہم سے پانی مانگا۔شیو کمار نے کہا کہ جس آدمی سے اس نے بات کی تھی وہ جنرل بپن راوت ہی تھا۔ عینی شاہد نے مزید کہا کہ اس حادثے کے بعد وہ ساری رات سو نہیں سکا۔ واضح رہے کہ بھارتی ریاست تامل ناڈو میں بھارتی فضائیہ کا ہیلی کاپٹر گر کر تباہ ہوگیا تھا جس میں سوار بھارتی فوج کے پہلے چیف ا?ف ڈیفنس اسٹاف (سی ڈی ایس) جنرل بپن راوت سمیت 13 افراد ہلاک ہوگئے تھے۔ بھارتی میڈیا کے مطابق ہیلی کاپٹر میں چیف آف ڈیفنس اسٹاف بپن راوت، ان کی اہلیہ، ڈیفنس اسسٹنٹ، سیکیورٹی کمانڈوز، فضائیہ کے پائلٹس سمیت مجموعی طور پر 14 افراد سوار تھے۔
