نواز شریف نے جاتی امرا میں اپنے والد اور بھائی کی قبر پر پھول چڑھائے محفل میلاد، لیگی رہنما ئوں اور کارکنوں کی شرکت

لاہور (خصوصی رپورٹر) مسلم لیگ ن کے صدر محمد نواز شریف نے گزشتہ روز جاتی امرا رائے ونڈ میں محفل میلاد میں شرکت کی اور اپنے والد میاں محمد شریف مرحوم اور چھوٹے بھائی میاں عباس شریف مرحوم کی قبروں پر حاضری دی اور پھول چڑھائے۔ محفل میلاد میں میاں شریف مرحوم کے زمانے سے جاتی امرا میں محفل میلاد میں شرکت کرنے والے عبدالرزاق جامی نے نعت رسول مقبولؐ اور حضرت میاں محمد بخش کا کلام سنایا۔ محفل میلاد میں حبیب اللہ بھٹی نے بھی نعتیہ کلام پیش کیا۔ اس موقع پر رائے ونڈ کے مسلم لیگی کارکنوں سمیت مختلف شہروں سے آنے والے کارکنوں نے شرکت کی۔ محفل میلاد میں جن نمایاں افراد نے شرکت کی ان میں سینیٹر سعود مجید، عارف سندھیلہ ایم پی اے، شوکت لالیکا ایم پی اے، رانا جاوید نثار، بجاش خان نیازی، ملک شاکر، مرزا جاوید، حاجی طلعت، ڈاکٹر مظہر شامل ہیں۔