ویمن ہاکی سپر لیگ، پشاور ڈیئرز اورکراچی ڈولفنز کی فتح

لاہور(اسپورٹس رپورٹر)دوسری پاکستان ویمن ہاکی سپر لیگ کے چوتھے روز مزید دو میچز کا فیصلہ ہو گیا۔ پشاور ڈیئرز اورکراچی ڈولفنز نے اپنے اپنے میچز جیت لئے۔ نیشنل ہاکی سٹیڈیم میں جاری سپر لیگ میں گزشتہ روز پشاور ڈیئرز اور کوئٹہ پینتھر کے درمیان کھیلا جانے والا میچ پشاور ڈیئرز نے 3-2 سے جیت لیا، پشاور ڈیئرز کی جانب سے ذکیہ نواز، مائرہ صابر اور فائقہ ریاض نے ایک ایک گول کیا جبکہ کوئٹہ پینتھر کی جانب سے اقراء حنیف اور کلثوم نواز نے ایک ایک گول سکور کیا۔ دوسرے مقابلے میں کراچی ڈولفنز نے اسلام آباد شاہین کو صفر کے مقابلے میں 4گول سے شکست دی، کراچی ڈولفنز کی جانب سے لائبہ شہباز، سدرہ کنول، ماہم فیاض اور نوشین نے ایک ایک گول کیا، آج ہفتہ کے روز بھی دو میچز کھیلے جائیں گے، پہلا مقابلہ لاہور لائنز اور کوئٹہ پینتھر جبکہ دوسرا مقابلہ کراچی ڈولفن اور پشاور ڈیئرز کے مابین ہوگا۔