لاہور(نامہ نگار)پولیس اورٹریفک وارڈنزکی ناقص حکمت عملی اور منصوبہ بندی کے فقدان کے باعث پاکستان اور جنوبی افریقہ کرکٹ ٹیموں کے درمیان ٹی ٹونٹی سیریز کے آغاز سے قبل ہی پریکٹس میچز کے دوران ہی ٹریفک مسئلہ گھمبیرصورتحال اختیار کر گیا ۔پولیس اور ٹریفک وارڈنز میچ پریکٹس کے دوران  قذافی سٹیڈیم سے ملحقہ سڑکوں بلکہ میلوں دور سے ہی کینال روڈ،فیروز پور روڈ،جیل روڈ اور گلبرگ کی سڑکیں اور راستے بیرئیر لگا کر بند کر دیتے ہیں جس سے  شہر بھر میں اہم شاہراہوں پر ٹریفک کا بد ترین جام ہوجاتا ہے ۔ پولیس اور وارڈنز کی ناقص حکمت عملی  سے معاملہ خراب ہوا ۔جیل روڈ اور شارع فاطمہ جناح پر ایمبولینسز بھی جام ٹریفک میں پھنسی نظر آئی  ہیں ۔شہرمیں متبادل راستوں پر ٹریفک چلانے کا کوئی موثر پلان اوربندوبست نہیں کیا ۔اس صورتحال پر شہریوں نے احتجاج کرتے ہوئے اعلیٰ حکام سے نوٹس لینے کا مطالبہ کیا ہے۔