لاہور(سپورٹس رپورٹر)چوتھا چیئرمین واپڈا امیچورزگالف ٹورنامنٹ آج سے لاہور جم خانہ گولف کلب میں شروع ہوگا۔ ملک بھر سے 300گالف کے کھلاڑیوں نے مختلف کیٹیگریز میں حصہ لینے کیلئے رجسٹریشن کروائی ہے۔ اِن خیالات کا اظہار ٹورنامنٹ کے منتظمین اور واپڈا سپورٹس بورڈ کے آفیسرز، ایڈوائزرز سپورٹس لیفٹیننٹ کرنل (ریٹائرڈ) آصف مہدی، شفقت رانا، کنوینر لاہور جم خانہ گالف کلب سرمد عظیم، ڈائریکٹر جنرل سپورٹس واپڈا مشرف خان، ایڈیشنل ڈی جی سپورٹس واپڈا، محمد رزاق گل اور خواجہ پرویز سعید نے لاہور جم خانہ میں ایونٹ کے حوالے سے پریس بریفنگ کے دوران کیا۔ یہ ٹورنامنٹ پاکستان گولف فیڈریشن کے تحت ہونے والے ٹورنامنٹس کا حصہ ہے۔ انہوں نے کہا کہ چیئرمین واپڈا گالف ٹورنامنٹ دِن بدن مشہور ہوتا جارہا ہے، اِس بات کا اندازہ ٹورنامنٹ میں شامل ہونے والے کھلاڑیوں کی تعداد سے لگایا جاسکتا ہے۔ یہ ٹورنامنٹ منعقد کرنے کا مقصد گولف کے شعبہ میں نیا ٹیلنٹ متعارف کرانے کیساتھ ساتھ دیگر سپورٹس گروپس بشمول پاکستان گالف فیڈریشن کے ساتھ واپڈا کے روابط مضبوط کرنا ہے۔