جنوبی افریقہ کے شہر ڈربن میں کھیلے جانے والے ٹونٹی ٹونٹی میچ میں بھارت نے ٹاس جیت کر پہلے بیٹنگ کرتے ہوئے مقررہ اوورزمیں چھ وکٹوں کے نقصان پرایک سو اڑسٹھ رنزبنائے۔ روہت شرما تریپن اورسریش رائنا اکتالیس رنزبناکرنمایاں رہے۔ جواب میں جنوبی افریقن ٹیم مقررہ اوورزمیں نو وکٹوں کے نقصان پرایک سو سینتالیس رنزبناسکی۔ اوپنرمورنی وین ویک کی نصف سنچری بھی رائیگاں گئی۔ڈربن میں کھیلا جانے والے یہ میچ جنوبی افریقہ کے باؤلر تینتیس سالہ ماکھایا نٹینی کا آخری بین الاقوامی میچ تھا۔ ماکھایا نٹینی اس میچ سے قبل انٹرنیشنل کرکٹ سے ریٹائرمنٹ کا اعلان کرچکے ہیں۔ نٹینی نے جب اپنی آخری بال پھینکی تو سٹیڈیم میں موجود پچاس ہزار تماشائیوں نے کھڑے ہوکر سیاہ فام باؤلر کو زبردست خراج تحسین پیش کیا۔ بھارت اور جنوبی افریقہ کے درمیان پانچ ون ڈے میچزکی سیریزکا پہلا میچ بدھ کو ہوگا۔