پشین: 2 نعشیں برآمد، جعفرآباد میں ریلوے ٹریک پر دھماکہ، آمدورفت معطل

جعفرآباد (آن لائن) بلوچستان کے علاقے جعفر آباد ڈیرہ الٰہ یار میں مری فارم کے مقام پر نامعلوم افراد نے ریلوے ٹریک کو دھماکہ خیزمواد سے اڑا دیا۔ دھماکے سے پٹڑی کا 6 فٹ ٹکڑا بری طرح متاثر ہوا۔ اندرون ملک سے کوئٹہ آنے اورکوئٹہ سے کراچی، پنجاب اور دیگر صوبوں کو جانے والی ٹرینوں کو مختلف ریلوے سٹیشنوں پر روک لیاگیا۔کوئٹہ آنے والی جعفر ایکسپریس اور بولان میل 6گھنٹوں کی تاخیرسے سبی ریلوے سٹیشن پر پہنچیں دھماکے کے بعد پولیس نے شاہی چوکی کے قریب کاروائی کے دوران پولیس اور ملزمان کے درمیان فائرنگ کے تبادلے کے بعد پولیس نے 8 مشکوک افراد کو گرفتار کر لیا۔ نامعلوم افراد کے خلاف مقدمہ درج کر لیا گیا، مرمت کے بعد ٹریک بحال کر دیا گیا۔ علاوہ ازیں لیویز کے مطابق پشین کے علاقے خانوزئی سے دو افراد کی لاشیں برآمد ہوئی ہیں۔ لاشیں دو سے تین دن پرانی ہیں اور ناقابل شناخت ہیں۔ لاشوں کو شناخت کے لئے ہسپتال منتقل کر دیا گیا۔