لاہور سمیت پنجاب بھر میں بار ایسوسی ایشنز کے انتخابات آج ہونگے

لاہور (اپنے نامہ نگار سے) لاہور سمیت پنجاب بھر میں آج تمام بار ایسوسی ایشنز کے انتخابات منعقد ہونگے۔ وکلا اپنے اپنے نمائندوں کی کامیابی کیلئے ایڑی چوٹی کا زور لگا رہے ہیں۔ لاہور بار ایسوسی ایشن کے سالانہ انتخابات برائے سال2016/2015 ء کے لئے آج سیشن کورٹ میں میدان لگے گا۔ پولنگ میں تین ہزار کے قریب خواتین سمیت 14263 رجسٹرڈ ووٹر اپنا حق رائے دہی استعمال کریں گے انتظامیہ کی طرف سے سکیورٹی کے سخت انتظامات کئے گئے ہیں۔ صدر کی سیٹ کے لئے حامد خان کے پروفیشنل گروپ کے امیدوار چودھری اشتیاق اے خان اور عاصمہ جہانگیر کے انڈیپنڈنٹ گروپ کی جانب سے ارشد جہانگیر جھوجہ کے درمیان کانٹے دار مقابلہ ہو گا جبکہ نائب صدر کی دو نشستوں کے لئے جہانگیر بھٹی، جام فرید خالد، نوید چغتائی، سلطان احمد اور ساجد منور قریشی میں مقابلہ ہوگا۔ نائب صدر ماڈل ٹائون سیٹ کے لئے تفسیر حیدر، ایم شہزاد کاکڑ اور میاں عابد میدان میں ہیں۔ سیکرٹری کی دو سیٹوں کے لئے پانچ امیدوار ادیب اسلم بھنڈر، بابر ہمایوں چوہان، جواد ملک، خرم میر اور سجاد بٹ آمنے سامنے ہیں۔ جوائنٹ سیکرٹری کی ایک نشست کے لئے رانا احسن اور میاں طاہر میں ون ٹو ون مقابلہ ہے۔ فنانس سیکرٹری کی ایک نشست کیلئے ایک خاتون سمیت تین امیدوار اجمل ملک، فضاہر جٹ اور رفعت طفیل میدان میں اترے ہیں۔ ممبر ایگزیکٹو کی 11 سیٹوں کیلئے صرف 8 امیدواروں آصف طفیل، تحسین زہرہ کاظمی، خالدہ ارشاد، سردار رشید احمد، عاشق علی رانا، فلک صبائ، انور خان اور نیک محمد چودھری نے کاغذات جمع کروائے جنہیں الیکشن بورڈ نے کامیاب قرار دے دیا ہے۔