پاکستان میں دوبارہ کھیلناچاہتا ہوں،آسٹرلین کرکٹرزدورہ کریں

لاہور (سپورٹس رپورٹر)پاکستانی نژادآسٹریلوی بیٹر عثمان خواجہ نے کہا ہے کہ پاکستان کا دورہ آسٹریلین کرکٹرز کیلئے گیم کو کچھ واپس دینے کا بہترین موقع ہے۔ پاکستانی قوم کرکٹ سے پیار کرنے والی قوم ہے، میں نے اپنے ساتھی کرکٹرز سے کہا ہے کہ وہ پاکستان کا دورہ کرکے وہاں کھیل کی بحالی، فروغ اور بہتری میں اپنا کردار ادا کر سکتے ہیں۔آسٹریلوی بیٹرنے کہا کہ مجھے برصغیر میں ہمیثہ سپورٹ ملتی ہے، بنگلہ دیش ، بھارت اور خاص طور پر پاکستان میں جہاں میں پیدا ہوا ہوں، جون جولائی میں میں نے پی ایس ایل کھیلی، اس میں میرے لیے سپورٹ بہت ہی شاندار تھا۔انہوں نے کہا کہ میں وہاں دوبارہ جا کر کھیلنا چاہتا ہوں اور یہ بہت دور بھی نہیں ہے، میرے خیال سے دورہ پاکستان کو کچھ دینے کے لیے اچھا موقع ہے جو کافی عرصے تک کرکٹ سے محروم رہا ہے۔عثمان خواجہ نے کہا کہ میں نے اپنے ساتھیوں سے بات کی ہے کہ یہ جنریشن آپ سے بہت متاثر ہے، جس نے کبھی ڈیوڈ وارنر کو ، مارش کو ، سٹیو سمتھ کو اپنی آنکھوں کے سامنے میدان میں کھیلتے نہیں صرف ٹی وی پر ہی دیکھا ہے۔کرکٹر نے کہا کہ میں پرامید ہوں نہ صرف اپنے لیے بلکہ پاکستان کرکٹ اور ان تمام نوجوان لڑکے اور لڑکیوں کیلئے جو مستقبل میں پروفیشنل کرکٹر بننا چاہتے ہیں۔